離開太魯閣,我地就包車沿住花蓮海岸線由北至南一路玩到瑞穗,
中途會停4個唔同嘅景點同餐廳,
包車邊走邊玩邊轉酒店嘅方法可以令行程豐富又唔使煩交通問題 。

Day 3 : 包車遊 [太魯閣晶英酒店-七星潭-055龍蝦海鮮餐廳(午餐)-親不知子海上古道-石梯坪 (住宿:瑞穗山下的厝溫泉民宿)]

第一個景點係七星潭,
七星潭其實係近花蓮空軍機地旁邊嘅海灣,
鋪滿大大小小嘅天然石春 遊人通常會坐喺岸邊觀海,
或者好似我阿媽同老豆咁執下石仔。

七星潭

花蓮有長長嘅海岸線 去得海邊點可以唔食海鮮?
我地午餐揀左一間主打新鮮龍蝦嘅海鮮餐廳


055龍蝦海鮮

我地揀左2隻細嘅龍蝦分別用清蒸同蒜蓉蒸 size大約一隻手咁大。

食飽繼續行程,下一個景點係有『台灣最驚險天空步道』之稱嘅『親不知子海上古道』
呢度係花蓮少有要收入場費嘅景點 雖然都只係大約港幣十蚊左右。

咁到底有咩特別值得要俾十蚊入黎睇呢?
步道於海上懸崖上嘅其中一段用強化玻璃而建,
由腳下可以望到自己正正企喺大海嘅上方,
希望令人產生懸空錯覺嘅恐懼感。



親不知子海上古道

不過其實呢段透明步道全長都唔知有無50米,
眨下眼就行完。

上番車再出發去今日最後一個景點:石梯坪。
登上呢個單面山,
唔單止可以飽覽石梯坪的地質景觀,
連太平洋的壯闊浩瀚景象都可以盡收眼底。

石梯坪

完成花蓮最後一個海線景點,
就經過差唔多一個鐘頭九曲十三彎嘅山路,
終於到達今晚入住嘅溫泉民宿了。

花蓮瑞穗係花東知名嘅溫泉鄉 早在日治時期日本人已經喺度成功開發溫泉
加上地理上有山景環繞 自然成為旅客喺大自然休息嘅好地方。

呢度嘅泉水係天然含鐵嘅碳酸鹽泉,
接觸空氣後鐵質會氧化 令泉水逐漸變為黃色,所以又叫「黃金湯」,
而呢度亦係傳說中嘅『 生男之湯 』,
民宿主人同我講佢地家族全部都生男丁,真係咁神奇?

經過一晚嘅休息 第二日包車嘅行程以田園風光為主
我地今日會由瑞穗返返去花蓮市中心 中途會經過5個景點:

Day 4 : 包車遊山線(花東縱谷線):瑞穗山下的厝溫泉民宿-瑞穗牧場-紅瓦屋老地方文化美食餐廳(午餐) – 光復糖廠-雲山水-立川漁場- 花蓮市中心酒店-東大門觀光夜市 (住宿:瑞穗山下的厝溫泉民宿)

第一站係民宿附近嘅瑞穗牧場,
牧場出名生產牛奶製品 。

遊客可以買牧草餵牛牛,或者可以好似我地咁執起地下食剩嘅牧草餵佢地一樣咁開心。

難得來到牧場點少得品嚐下新鮮嘅乳製品?牧場入面嘅售賣部就有曬各式各樣嘅牛奶甜品。

來得花蓮梗係要試下原住民特色菜,
體驗下從前原住民用原始部落生存技巧所烹調嘅菜,
午餐在紅瓦屋原住民文化餐廳。

石頭火鍋就係模仿原住民用燒到紅卜卜嘅石頭直接放入海鮮湯入面,
海鮮湯即時滾起 再加入菜一齊煮一陣就完成石頭海鮮湯。

食到好飽真係要散下步先得,
下一個景點係因為偶像劇同廣告取景而火紅嘅地方-雲山水

雲山水原本係由一間綠化造景公司擁有,
佢賣地俾人興建別墅嘅時候規定 買家一定要包留大部份嘅土地做綠化園林。

湖嘅中段仲有一條踏石橋,成為雲山水最受歡迎嘅打卡位 ,
驟眼睇呢度嘅湖水真係特別藍,唔怪得咁多人來打卡啦~

來到包車行程最後一個景點,
立川漁場專出產營養價值極高嘅黃金蜆,
喺呢度摸到嘅蜆係不設現場加工,遊客最多只可以帶走一斤生蜆,
可能體驗都係針對小朋友為主,接近傍晚時間只係得一位客人喺度體驗摸蜆。

我地今次揀嘅酒店位於中正路,周圍算係熱鬧嘅旺區,酒店佈置係走商務旅館嘅風格。

由酒店步行15分鐘左右就到達花蓮市最熱鬧嘅東大門觀光夜市。

花蓮相對台北黎講行街shopping嘅地方真係唔多,
喺酒店對面就有花蓮最大嘅文創園區,
前身係百年歷史嘅舊酒廠 依家就修復為藝術工作室同精品小店,
真係好欣賞台灣活化古蹟嘅能力。

A-zone文化創意產業園區

5日4夜嘅花蓮之旅來到尾聲,
花蓮有齊奇山、大海、田園、溫泉等四大賣點,
食嘅野又啱長老口味,啱曬帶埋父母來走動下!

以上行程詳細可以睇片:https://goo.gl/gvrk8z

_______________________

瑞穗山下的厝溫泉民宿 https://bit.ly/2PsSMmE

捷絲旅花蓮中正館 JustSleep Hualien Zhongzheng https://bit.ly/2NAUalo

【香港出發】2位成人花蓮自由行機票+酒店低至4折優惠!https://bit.ly/2RD3poo

首選花蓮酒店優惠HK$319每晚起! https://bit.ly/2Ec6UPZ

特價花蓮機票連稅由HK$916起! https://bit.ly/2RGkn5B

行程支持 : Expedia hk

Expedia+ 預訂酒店或機票可獲會員積分及享有專屬優惠價格。 免費加入!